Lajmet e fundit

Proceset aktuale politike që po zhvillohen në Kosovë, si dhe përpjekjet e përbashkëta për integrime evro-atlantike, ishin temë themelore të takimit të sotëm të kryetarit të Kuvendit të Republikës së Kosovës , Jakup Krasniqi, me kryetarin e Lëvizjes Socialiste për Integrim të Shqipërisë, Ilir Meta.

Në prononcimin për media kryeparlamentari Krasniqi theksoi se e ka përgëzuar bashkëbiseduesin për ftesën për pranim që NATO-ja këto ditë i bëri Shqipërisë. Në takim u bisedua edhe për çështje të tjera të bashkëpunimit ndërparlamentar.

Kryetari i LSI-së, Ilir Meta, shprehu kënaqësinë për takimin që pati me kryeparlamentarin e shtetit më të ri në botë. Është ky realizim i një aspirate të të gjithë shqiptarëve ku do që jetojnë ata .Ai theksoi se biseduan edhe për punën e Parlamentit të Kosovës, sidomos në aspektin e çuarjes përpara të proceseve demokratike. Gëzon fakti, u shpreh Meta,për bashkëpunimin konstruktiv që bëjnë grupet parlamentare gjatë punimeve të Kuvendit të Kosovës. Ilir Meta u angazhua edhe për thellimin e bashkëpunimit të komisioneve respektive të Shqipërisë dhe të Kosovës drejt integrimeve evropiane.

Kosova dhe Shqipëria, theksoi më tutje Meta, si dy vende me traditë dhe histori të përbashkët i bashkon edhe filozofia e integrimeve evropiane. Në këtë drejtim ky bashkëpunim do të jetë kontribut për progres në këto procese, jo vetëm për Shqipërinë dhe Kosovën, por edhe për tërë Ballkanin Perëndimor.