Lajmet e fundit

Çështja e akreditimit e institucioneve private të arsimit të lartë, vështruar në dritën e Raportit të Këshillit Britanik për Akreditim dhe vendimit që pasoi nga ane e Ministrisë së Arsimit, Shkencës dhe Teknologjisë, për të ndaluar regjistrimin e studentëve të rinj në këto institucione në vitin akademik 2008_2009, ishte temë bosht e dëgjimit të sotëm publik, të organizuar nga ane e Komisionit për Arsim, Shkencё, Teknologji, Kulturё, Rini e Sport, i kryesuar nga Agim Veliu, kryetar i komisionit, në të cilin ishin ftuar përfaqësues të institucioneve private të arsimit superior të Kosovës.

Në fjalët e përfaqësuesve të Universitetit të Biznesit dhe Teknologjisë dhe të universitetit “Dardania”, u tha se megjithëse akreditimi është një proces mjaft kompleks, ai u bë në afat të shkurtër. Si vizita, ashtu edhe analiza e vlerësimet nga ana e Këshillit Britanik u bënë shumë shpejt, përkatësisht pa i definuar kriteret e akreditimit. Tërë ky proces kaloi pa u dëgjuar fjala e institucioneve të arsimit superior. Në këtë mënyrë është shkelur Ligji mbi Arsimin e Lartë dhe Kushtetuta. Gjithë kjo i demotivoi institucionet e larta, pasi të gjitha u futën në një thes. Nuk u tha se cilat universitete nuk i plotësuan këto apo ato kritere, çka vlen e çka nuk vlen në punën e tyre. Kjo tregon se u morën masa administrative ndaj këtyre universiteteve pa u peshuar mirë. Përfaqësuesit e institucioneve të arsimit superior në vijim u përgjigjën edhe në disa pyetje të anëtarëve të Komisionit.

Pas debatit u mor qëndrim që këto vërejtje të shqyrtohen në një mbledhje të ardhshme nga ane e komisionit për të nxjerrë rekomandimet e nevojshme lidhur me këtë çështje.

Binte në sy se disa universitete, megjithëse ishin ftuar, nuk iu kishin përgjigjur ftesës për të marrë pjesë në këtë dëgjim publik.