Lajmet e fundit

Kryetari i Kuvendit të Kosovës, Jakup Krasniqi, kishte sot një takim me ambasadorin e Gjermanisë në Prishtinë, Hans Dieter Steinbach. Temë qendrore e takimit ishte thellimi i mëtejmë i bashkëpunimit ndërmjet Kosovës dhe Gjermanisë. Në këtë frymë, bashkëbiseduesit folën më hollësisht lidhur më aktivitetet që do të zhvillohen, sidomos në lëmin e marrëdhënieve ndërparlamentare. Z. Steinbach theksoi se Gjermania gjithnjë do të jetë në mbështetje të Kosovës. Në këtë vështrim ai përmendi edhe faktin e pjesëmarrjes së policëve gjermanë dhe stafit tjetër në kuadër të EULEX-it në Kosovë. Ai vlerësoi lart punën e Kuvendit të Kosovës . Viti 2008, tha ai, ishte vit i suksesshëm , duke ditur se ai është vit i Kushtetutës dhe i Pavarësisë së Kosovës. Në kuadër të bashkëpunimit të mëtejmë ndërmjet parlamenteve të Gjermanisë dhe të Kosovës do të bëhen përgatitje që kryeparlamentari Krasniqi vitin e ardhshëm të vizitojë Bundestagun. Në këtë takim u hodh edhe ideja për formimin grupit të miqësisë ndërmjet deputetëve gjermanë dhe atyre kosovarë.

Kryeparlamentari Krasniqi, me këtë rast, shprehu keqardhje për incidentin që ndodhi lidhur me arrestimin e tre shtetasve gjermanë. Z. Steinbach, përkitazi me këtë, tha se ky rast nuk do të ketë reflektime negative në marrëdhëniet tradicionalisht të mira ndërmjet Kosovës dhe Gjermanisë.