Lajmet e fundit

Kryetari i Kuvendit të Republikës së Kosovës, Jakup Krasniqi, ka uruar sot qytetarët e Kosovës me rastin e festës së Vitit të Ri 2009. Në mesazhin e kryeparlamentarit Krasniqi në vigjilje të ndërrimit të moteve thuhet:

Të nderuar qytetarë të Republikës së Kosovës,

Viti që po e lëmë pas ishte vit historik për qytetarët e Kosovës,

Ishte vit i pavarësisë,
i simboleve të shtetit,
i Kushtetutës moderne dhe
vit i njohjes ndërkombëtare;
ishte vit i sigurisë dhe i stabilitetit.

Republika e Kosovës po i krijon parakushtet e të ardhmes së saj të sigurt si shtet i pavarur, sovran, demokratik dhe i mirëqenies qytetare.

Viti 2009 do të shënojë hapa të rinj drejt këtij qëllimi fisnik.

Besoj dhe dëshiroj që Viti i Ri 2009 në çdo familje dhe për çdo qytetar të sjellë: fat, shëndet, mirëqenie dhe begati.

Urime shqiptarëve kudo që janë për Vitin e Ri 2009!

Në këtë natë të ndërrimit të moteve urime për të gjitha subjektet ndërkombëtare në Kosovë. Urime të përzemërta u shpreh ICO-s, EULEX-it, UNMIK-ut, OSBE-së, komandantëve dhe ushtarëve të KFOR-it, si dhe përfaqësive diplomatike të akredituara në Kosovë.

Shëndet dhe mbarësi edhe për familjet e tyre!

Gëzuar!