Lajmet e fundit

Pavarësia e Kosovës i dha fund një  periudhe  të rëndë e tejet tragjike që përjetoi populli i Kosovës Ruajtja e tërësisë territoriale  dhe stabiliteti i Kosovës  është me interes të gjerë, jo vetëm rajonal
Turqia do të vazhdojë të  mbështesë Kosovën, ashtu si e ka mbështetur edhe në momentet  më të vështira Republika e Turqisë ka pasur dhe vazhdon të ketë rol të veçantë në mbrojtjen e drejtësisë karshi çështjes së Kosovës , në rindërtimin e rimëkëmbjen e vendit tonë të dalë nga lufta shkatërruese dhe në sigurinë e në ngritjen e themeleve të Kosovës së re

Në shenjë të vizitës së  ministrit të Punëve të Jashtme të Republikës së Turqisë, Ali Babacan, që po i bën Kosovës, sot u mbajt mbledhja solemne e Kuvendit të Kosovës, e kryesuar nga Jakup Krasniqi, kryetar i Kuvendit.Në mbledhje merrnin pjesë edhe kryetari i Kosovës, Fatmir Sejdiu dhe kryeministri Hashim Thaçi, si dhe përfaqësues  diplomatik ndërkombëtarë.

Kryeparlamentari Jakup Krasniqi, pasi përshëndeti të pranishmit  dhe mysafirin e lartë në emër të tij dhe të deputetëve tha:” I nderuari zoti Babaxhan, mirë se keni ardhur në Republikën e Kosovës dhe në këtë seancë solemne parlamentare .

Ardhjen Tuaj në Kosovë, sikur edhe vizitën tonë të para pak ditëve që patëm në Turqi, i konsiderojmë si mesazhe dhe konfirmim të miqësisë midis dy vendeve e popujve tanë dhe si shprehje e vullnetit e gatishmërisë për thellimin e marrëdhënieve tona në të gjitha fushat. Këto marrëdhënie të shkëlqyeshme do të përparohen, duke qenë jo vetëm në interesin tonë dypalësh, por edhe në dobi të bashkëpunimit rajonal, të integrimeve euroatlantike dhe të paqes në rajon.

Gjej rastin të falënderoj Republikën e Turqisë dhe institucionet e saj si dhe Juve personalisht, zoti Babaxhan, për kontributin e madh që keni dhënë për vendin tonë dhe për përpjekjet aktuale që po bëni në ndihmë të proceseve historike nëpër të cilat po kalon Republika e Kosovës. Republika e Turqisë ka pasur dhe vazhdon të ketë rol të veçantë në mbrojtjen e drejtësisë karshi çështjes së Kosovës , në rindërtimin e rimëkëmbjen e vendit tonë të dalë nga lufta shkatërruese dhe në sigurinë e në ngritjen e themeleve të Kosovës së re .

Turqia është nga vendet e para që ka njohur pavarësinë e Kosovës dhe njëri ndër miqtë tanë të çmuar që po e ushtron gjithë ndikimin gjithandej për njohjen sa më të gjerë ndërkombëtare të Republikës së Kosovës. Kosova e re po ndërtohet si vend i lirë , sovran dhe demokratik, në të cilin jetojnë të barabartë qytetarët, pa asnjë dallim .

Komuniteti turk në Kosovë, sikur edhe bashkatdhetarët tanë, shtetas turq në Republikën e Turqisë , do të jenë faktorë dhe ura lidhëse midisi dy vendeve tona mike .
Duke ju falënderuar edhe njëherë, kam kënaqësinë t’ju ftoj zoti Babaxhan t’i drejtoheni me një fjalë Kuvendit të Republikës së Kosovës”.

Duke iu drejtuar të pranishmëve ministri i  Punëve të Jashtme të Republikës së Turqisë, Ali Babacan tha se ndihet  i lumtur  që  sot është   këtu, në Kuvendin e Republikës së Kosovës, prej nga juve dhe mbarë popullit të Kosovës t’ ju uroj një të ardhme sa më mirë dhe njëkohësisht t’ ju uroj Pavarësinë e Kosovës. E falënderoj Kuvendin që më dha këtë rast historik, këtë mundësi për t’ iu drejtuar nëpërmjet jush edhe popullit të Kosovës, me të cilin populli turk ka lidhje  të ngushta shoqërore, historike dhe kulturore. Këto lidhje  forcohen edhe më duke ditur se në Kosovë jetojnë pjesëtarë turq, e gjithashtu edhe në Turqi jetojnë qytetarë me origjinë nga Kosova , të cilët shërbejnë si urë lidhëse ndërmjet Kosovës dhe Turqisë, për thellimin e mëtejme të këtyre marrëdhënieve  shumë të mira ndërmjet dy vendeve.

Turqia gjithnjë i ka kushtuar kujdes  Kosovës dhe Ballkanit, që ishin nën ndikimin e rrymave të ndryshme, ndërsa tash Ballkani po kërkon konsolidimin e tij. Më 17 shkurt, kur Kuvendi i Kosovës është mbledhur këtu, po atë ditë, ne në Ministrinë tonë kemi shprehur  gëzimin e përbashkët me ju, jetonim me ndjenjat tuaja, përjetonim bashkë gëzimin e shpalljes së Pavarësisë së Kosovës. Pavarësia e Kosovës u ndoq  me entuziazëm edhe në botë. Pavarësia e Kosovës i dha fund një  periudhe  të rëndë e tejet tragjike që përjetoi populli i Kosovës.

Vendimi historik  për Pavarësinë e Kosovës  u mor në bashkëveprim me komunitetin ndërkombëtar. Turqia gjithnjë angazhohet që  në Ballkan të mbretërojë paqja dhe stabiliteti. Në këtë vështrim ruajtja e tërësisë territoriale  dhe stabiliteti i Kosovës  është me interes të gjerë jo vetëm rajonal. Në vijim ministri Ali Babacan u angazhua për  vendosjen e  të drejtave  themelore njerëzore. Në këtë vështrim ai tha se Kosova duke garantuar e sendërtuar të drejtat e komuniteteve  është një shembull shumë i mirë . Një shenjë shumë inkurajuese është fakti që në Qeverinë e Kosovës është një ministër turk, ndërsa në Kuvend janë tre deputet turq. Është trimërues edhe thellimi i bashkëpunimit   me shtetet fqinje, ashtu si parashihet edhe me Kushtetutën e Kosovës.

Marrëdhëniet me fqinjët duhet të forcohen me angazhim të sinqertë. Duke u angazhuar kështu Ballkani  do të  shndërrohet në një rajon stabil. Turqia do të vazhdojë të  mbështesë Kosovën, ashtu si e ka mbështetur edhe në momentet  më të vështira.

Në vazhdim Ali Babacan tha se duhet të marrim mësim nga shtetet e ndryshme të Evropës, të cilat  në Luftën e Dytë Botërore patën luftuar ndërmjet vete, por pas luftës  ato iu kthyen bashkëpunimit dhe formuan BE-në. Ballkani duhet të integrohet në BE, të gjithë ne duhet t’ i kemi dyert e hapura në BE, sepse kjo është perspektiva jonë. Turqia do të jetë bashkë me ju, ajo është e gatshme t’ ju ndihmojë. Bashkëpunimi ndërmjet dy shteteve tona po zhvillohet me shpejtësi. Brenda një kohe të shkurtër hapëm ambasadat. Vizita e këto ditshme e kryetarit të Kuvendit të Kosovës  në Turqi i dha një  shtytje  të mëtejme këtij bashkëpunimi. Reflektim pozitiv  në këtë bashkëpunim ka edhe  interesimi gjithnjë e më i madh i biznesmenëve  nga Turqia për të investuar në Kosovë.

Kësaj rruge investimet do të rriten edhe më . Një shtytje të re bashkëpunimit të gjithëmbarshëm ndërmjet Turqisë dhe Kosovës do t’ i japë edhe nënshkrimi i dy marrëveshjeve, të cilat do të nënshkruhen sot e që kanë të bëjnë me strategjinë e përbashkët të bashkëpunimit dhe ajo për heqjen e vizave. Në këtë mënyrë  si qytetarët nga Kosova, ashtu edhe ata nga Turqia më nuk do të kenë nevojë të nxjerrin viza për të qarkulluar  ndërmjet këtyre dy vendeve.

Ministri Ali Babacan  pastaj foli edhe për kontributin e ushtarëve turq në kuadër të KFOR-it në Kosovë, si dhe  për  kontributin që jep Turqia në shkollimin kuadrove të reja nga Kosova në Turqi.