Lajmet e fundit

Si të mbrohen të drejtat dhe liritë e qytetarëve të Kosovës dhe ç’funksion do të ketë Ombudspersoni në të ardhmen, ka qenë temë bisede në takimin e kryetarit të Kuvendit të Kosovës, Kolë Berisha me ushtruesin e detyrës së Ombudspersonit, Hilmi Jashari.

Kompetenca të plota për Avokatin e Popullit

Zotëri Jashari ka kërkuar nga kreu i Kuvendit që Ombudspersoni në të ardhmen të jetë Avokat i Popullit dhe të ketë kompetenca të plota në ushtrimin e këtij funksioni me rëndësi shoqërore, sikurse ndodhë në shumë vende demokratike të botës. Ai ka pohuar, ndërkaq, se me Rregulloren e UNMIK-ut, të 17 shkurtit 2006, janë cunguar ndjeshëm kompetencat e Ombudspersonit.

Avokati - mekanizëm i Kuvendit

Kryeparlamentari Berisha ka qartësuar se Avokati i Popullit do të jetë mekanizëm i Kuvendit të Kosovës për mbrojtjen e të drejtave dhe lirive të qytetarit. Kreu i Kuvendit ka thënë se do të kujdeset të miratohet Ligji për Avokatin e Popullit dhe të zbatohet në mënyrën më të mirë.