Lajmet e fundit

Kryetari i Kuvendit të Republikës së Kosovës, dr.Jakup Krasniqi, ka uruar sot kryetaren e Kuvendit të Republikës së Shqipërisë Sh. S. Zonjën Jozefina Topalli me rastin e miratimit nga Parlamenti Evropian të raportit për liberalizimin e vizave.

Në telegramin e urimit të kryeparlamentarit Krasniqi thuhet:

E nderuar Zonja Jozefina Topalli

Kam kënaqësinë e veçantë që në emër të Kuvendit dhe të popullit të Republikës së Kosovës t'ju uroj Juve dhe popullit të Republikës së Shqipërisë votimin e Parlamentit Evropian për heqjen e vizave për qytetarët shqiptarë me vendet e Bashkimit Evropian.

Duke përshëndetur miratimin e raportit për liberalizimin e vizave nga Parlamenti Evropian, i cili hap rrugën lëvizjes së lirë të shqiptarëve, shpreh bindjen time të thellë në suksesin e Republikës së Shqipërisë drejt integrimit në Bashkimin Evropian.

Ju siguroj, Shkëlqesi që Republika e Kosovës do të angazhohet për thellimin e marrëdhënieve dhe bashkëpunimit vëllazëror midis dy vendeve tona.

Pranoni konsideratën time më të lartë për Ju dhe për popullin e Shqipërisë.