Lajmet e fundit

Projektligjin për Agjencinë e Kosovës për mbrojtje nga rrezatimi dhe siguria bërthamore, Komisioni për Bujqësi, Pylltari, Zhvillim Rural dhe Mjedis e Planifikim Hapësinor i Kuvendit të Kosovës, do ta shqyrtojë në mbledhjen e radhës. Kështu u vendos në mbledhjen e sotme kryesuar nga Nait Hasani, kryetar i Komisionit. Këtë vendim, Komisioni e mori me arsyetimin se gjatë shqyrtimit të këtij projektligji duhet të jenë të pranishëm edhe përfaqësuesit e Ministrisë së Mjedisit dhe Planifikimit Hapësinorë. Ndërkaq, lidhur me Projektligjin për bujqësi organike, Projektligjin për parkun kombëtar Bjeshkët e Nemuna dhe Projektligjin për Qendrën Historike të Prizrenit, Komisioni formoi grupet punuese për amendamentimi e tyre. Lidhur me këtë, Komisioni diskutoi edhe për mundësin e angazhimit të ekspertëve për ndihmë profesionale gjate draftimit të këtyre projektligjeve.
Në këtë mbledhje, u diskutua edhe për punën e deritashme të Komisionit. Anëtarët e Komisionit duke bërë një rekapitullim të aktiviteteve të këtij viti, vlerësuan se viti që po lëmë pas, është një nga vitet më të suksesshme të Komisionit.