Lajmet e fundit

Komisioni për Buxhet dhe Financa i Kuvendit të Republikës së Kosovës, në mbledhjen e sotme të kryesuar nga Safete Hadërgjonaj, kryetare e komisionit, ka përkrahur në parim Projektligjin për taksën rrugore dhe ekologjike të automjeteve, si dhe raportin e shpenzimeve të Kuvendit të Kosovës për tremujorin e parë të vitit 2012.

Sa i përket Projektligjit për komunikimet elektronike, me amendamente të komisionit funksional, komisioni vendosi që të krijojë një grup punues për shqyrtimin dhe harmonizimin e disa neneve të tij me ligjet bazike ekzistuese.

Pas kërkesës së zv/ministrit të Punëve të Jashtme, Ibrahim Gashi, komisioni u dakordua që të shtyjë shqyrtimin e Marrëveshjes për statusin e forcave (SOFA) në mes Qeverisë së Republikës së Kosovës dhe Qeverisë së Shteteve të Bashkuara të Amerikës, e realizuar përmes shkëmbimit të Notave verbale ndërmjet Ministrit të Punëve të Jashtme të Republikës së Kosovës dhe Zëvendës Sekretarit të Shteteve të Bashkuara të Amerikës, më 18 shkurt 2012.