Lajmet e fundit

Komisioni për Buxhet dhe Financa i Kuvendit të Republikës së Kosovës, i kryesuar nga Safete Hadërgjonaj, kryetare, ka shqyrtuar sot një raport vjetor financiar, një projektligj dhe kërkesat buxhetore të Kuvendit të Kosovës në bazë të Qarkores së parë të Ministrisë së Financave 2014/01.

Raportin financiar vjetor të Zyrës së Auditorit të Përgjithshëm (ZAP) për vitin 2012, e paraqiti Lage Olofsson, Auditor i Përgjithshëm, i cili shpalosi të dhëna lidhur me shpenzimet financiare të këtij institucioni gjatë vitit të kaluar. Anëtarët e komisionit, ndërkaq, ngritën çështjen e tejkalimit të shpenzimeve të buxhetit në disa kategori buxhetore. Komisioni u pajtua që ta rishqyrtojë sërish këtë raport, me kërkesën që ZAP-i të sjellë të dhëna shtesë lidhur me shpenzimet.

Në vazhdim, komisioni shqyrtoi Projektligjin për skemat pensionale të financuara nga shteti, me raportin plotësues me amendamente të komisionit funksional. Komisioni, sikurse ministri i Financave, Besim Beqaj, i cili ishte i pranishëm në këtë mbledhje, vlerësuan se disa prej amendamenteve të propozuara nga komisioni funksional, rrisin ndjeshëm koston financiare të këtij projektligji dhe rrjedhimisht, rrezikojnë zbatimin e tij.

Kështu, komisioni nuk i përkrahu ato amendamente, për të cilat u vlerësua se përmbajnë implikime shtesë buxhetore.

Në këtë mbledhje, komisioni përkrahu kërkesat buxhetore të Kuvendit të Kosovës në bazë të Qarkores së parë të Ministrisë së Financave 2014/01, të cilat i prezantoi sekretari i përgjithshëm i Kuvendit, Ismet Krasniqi. Kërkesat për buxhetore lidhur me rishikimin e buxhetit të Kuvendit për vitin 2013, ndërkaq, do të shqyrtohen gjatë fazës së rishikimit të buxhetit të shtetit.