Lajmet e fundit

Komisioni për Buxhet dhe Financa i Kuvendit të Republikës së Kosovës, në mbledhjen e sotme, të kryesuar nga Safete Hadërgjonaj, kryetare, ka shqyrtuar një projektligj dhe një raport të shpenzimeve.

Komisioni shqyrtoi dhe përkrahu raportin me amendamente të grupit punues për Projektligjin për Agjencinë kosovare për krahasim dhe verifikim të pronës dhe e procedoi tutje në Kuvend, me konstatimin që amendamentet nuk përmbajnë implikime shtesë buxhetore.

U shqyrtua, gjithashtu, edhe raporti i të hyrave dhe shpenzimeve të Radiotelevizionit të Kosovës për periudhën janar-qershor 2013 dhe projeksioneve të të hyrave dhe shpenzimeve të RTK-së për periudhën korrik-dhjetor 2013, të cilat i prezantoi drejtori i përgjithshëm, Mentor Shala. Duke pasqyruar shpenzimet e RTK-së gjatë këtij gjashtëmujori, Shala theksoi se në këtë vit radiotelevizioni publik ka hyrë me plane, por edhe me borxhe të mëdha. Ai tha se gjatë këtij gjashtëmujori janë shlyer rreth 1.5 milionë euro borxhe dhe po ecet sipas dinamikës së paraparë në shlyerjen e borxheve të tjera.

Sa i përket planeve për të ardhmen, Shala paralajmëroi hapjen e dy kanaleve të reja dhe potencoi domosdoshmërinë e digjitalizimit të RTK-së.

Anëtarët e komisionit shtruan pyetje por edhe ngritën disa shqetësime përkitazi me shpenzimet e raportuara.

Pas diskutimeve, komisioni përkrahu raportin e të hyrave dhe shpenzimeve të RTK-së për periudhën janar-qershor 2013 dhe projeksioneve të të hyrave dhe shpenzimeve për periudhën korrik-dhjetor 2013, dhe e procedoi për në Kryesi të Kuvendit.