Lajmet e fundit

Në seancën e sotme të Kuvendit të Kosovës (e fundit e këtij sesioni pranveror) të drejtuar nga dr. Jakup Krasniqi, kryetar i Kuvendit (një pjesë të saj e ka drejtuar nënkryetari Xhavit Haliti), deputetët kanë ratifikuar tri marrëveshje ndërkombëtare të lidhura nga Qeveria e Kosovës: Projektligjin për Ratifikimin e Marrëveshjes Kornizë ndërmjet Qeverisë së Republikës së Kosovës dhe Bankës Evropiane për Investime, që rregullon aktivitetet e Bankës Evropiane për Investime në Kosovë, Projektligjin për ratifikimin e Marrëveshjes Financiare ndërmjet Republikës së Kosovës dhe Asociacionit Ndërkombëtar për Zhvillim - Financimi i dytë shtesë për projektin e pastrimit të sektorit të energjisë dhe të bonifikimit të tokave - CLRP, si dhe Projektligjin për Ratifikimin e Marrëveshjes Financiare „ISTISNA'A" dhe Marrëveshja për Agjencinë „ISTISNA'A" për financimin e vazhdimit të ndërtimit të rrugës Milloshevë - Mitrovicë, Rruga M2, e lidhur ndërmjet Qeverisë së Republikës së Kosovës dhe Bankës Islamike për Zhvillim.

Arsyetimin e për ratifikimin e këtyre marrëveshjeve e ka prezantuar ministri i Transportit Fehmi Mujota, i cili duke i vlerësuar si shumë të rëndësishme për ekonominë e Kosovës dhe për bashkëpunimin e Kosovës me mekanizmat relevant financiar ndërkombëtar, i ka ftuar deputetët që të votojnë ratifikimin e tyre.

Për secilën marrëveshje radhazi shefat e grupeve parlamentare kanë dhënë pajtimin e tyre, prandaj në fund edhe janë votuar me shumicë votash të deputetëve ( dy të parat me votë unanime të deputetëve, kurse marrëveshja e tretë vetëm me një votë "kundër").

Në vazhdim të seancës deputetët kanë shqyrtuar për herë të parë Projektligji për fshatin Zym të Hasit, arsyetimin e të cilit dhënë deputeti nga radhët e AAK-së, Daut Haradinaj, si propozues i këtij Projektligji. Ai duke folur për rëndësinë historike dhe kulturore që ka fshati Zym, ka kërkuar që të votohet në parim ky projektligj. Shumica e atyre që kanë folur në emër të grupeve të tyre parlamentare i kanë dhënë mbështetje projektligjit, përveç Liburn Aliut, nga Vetëvendosje!, i cili projektligjin e ka quajtur kopjim të keq të një ligji të keq, siç ishte Ligji për Hoçën e Madhe, duke konstatuar se kjo qendër e rëndësishme kombëtare e meriton kujdesin, por edhe një ligj shumë më të mirë. Në përfundim projektligji në fjalë është miratuar me shumicë votash të deputetëve.

Në seancën e sotme janë shqyrtuar për herë të dytë dhe janë miratuar përfundimisht tetë projektligje që lidhen me procesin e liberalizimit të vizave.

Raportet me rekomandime për këto projektligje ( për secilin veç e veç): i ka arsyetuar nënkryetari i Komisionit për Punë të Brendshme dhe Siguri, Fatmir Xhelili. Projektligjet e miratuara janë: Projektligji për të huajt, Projektligji për Bashkëpunim Juridik Ndërkombëtar në Çështjet Penale, Projektligji për ndryshimin dhe plotësimin e Ligjit nr. 04/L-072 për kontrollin dhe mbikëqyrjen e kufirit shtetëror, Projektligji për bashkëpunim ndërmjet autoriteteve të përfshira në menaxhimin e integruar të kufirit, Projektligji për Shtetësinë e Kosovës, Projektligji për Azil, Projektligji për parandalimin dhe luftimin e trafikimit me njerëz dhe mbrojtën e viktimave të trafikimit, si dhe Projektligji për plotësimin dhe ndryshimin e Ligjit nr. 03/L-174 për financimin e subjekteve politike, të ndryshuar dhe plotësuar me Ligjin nr. 04/L-058.

Deputetët e kanë shqyrtuar dhe miratuar edhe Projektligjin për mbrojtjen e burimeve të gazetarisë, të cilin e ka prezantuar nismëtarja për këtë projektligj, deputetja, Alma Lama.

Në përfundim të seancës, duke i falënderuar për punën dhe angazhimin e tyre, kryeparlamentari Krasniqi ka dhënë një rezyme të punës së Kuvendit në sesionin pranveror, duke specifikuar 33 mbledhje të Kryesisë, 105 vendime dhe 57 përfundime të këtij organi. Ai ka pohuar se Kuvendi ka mbajtur 43 mbledhje plenare; ka proceduar 51 projektligje, ka miratuar 49 sosh, duke përmendur se 11 projektligje gjenden në shqyrtim të parë dhe 10 projektligje që i janë kthyer Qeverisë për ripunim. Janë miratuar, ndërkaq, 20 rezoluta, deklarata dhe rekomandime, si dhe janë shtruar 145 pyetje parlamentare.

Duke iu uruar pushim të mirë dhe energji të reja pune, ai i ka përkujtuar deputetët se sesioni vjeshtor fillon të hënën e dytë të muajit shtator. Ai, ndërkaq, ka pasur vërejtje për stërzgjatjen e shumë seancave për mungesë kuorumi të deputetëve, si dhe për Kabinetin qeveritar që shpërfill obligimin t'u përgjigjet pyetjeve parlamentare të deputetëve.